Senani News

* వర్ధంతి సందర్భంగా స్మరణ
* చిత్రపటానికి పూలమాల వేసి నివాళులర్పించిన ఉపరాష్ట్రపతి
* హరిత, శ్వేత విప్లవాలకు పునాది వేసిన దార్శనికుడు
* ఆహార భద్రతకు ఆయన కృషి చిరస్మరణీయం

న్యూఢిల్లీ, నవంబర్‌ 7 (సేనాని ప్రతినిధి): భారతరత్న, స్వాతంత్ర్య సమరయోధుడు సి. సుబ్రహ్మణ్యం వర్ధంతి సందర్భంగా ఉపరాష్ట్రపతి నివాళులర్పించారు. ఉపరాష్ట్రపతి నివాసంలో ఆయన చిత్రపటానికి పూలమాల వేసి ఘనంగా స్మరించుకున్నారు. దేశ స్వాతంత్ర్యానంతరం ప్రజా పరిపాలనలో కీలక బాధ్యతలు చేపట్టి, దేశాభివృద్ధికి విశేష సేవలందించిన సి. సుబ్రహ్మణ్యం సేవలను ఈ సందర్భంగా గుర్తుచేసుకున్నారు. త్యాగం, నిజాయతీ, దేశభక్తి వంటి ఉన్నత విలువలకు ఆయన తన జీవితాన్ని అంకితం చేశారని కొనియాడారు. స్వాతంత్ర్య సమరయోధుడిగా ప్రజాజీవితంలోకి వచ్చిన సి. సుబ్రహ్మణ్యం స్వాతంత్ర్యం అనంతరం తమిళనాడు ప్రభుత్వంతో పాటు కేంద్ర ప్రభుత్వంలోనూ పలు కీలక పదవులు నిర్వహించారు. ప్రజా పరిపాలనలో తనదైన ముద్ర వేసి, బాధ్యతలను సమర్థంగా నిర్వర్తించారు. మహారాష్ట్ర గవర్నర్‌గా కూడా విశేష సేవలందించారు. సుదీర్ఘ ప్రజాజీవితంలో పదవులకే పరిమితం కాకుండా ప్రజా సంక్షేమం, దేశ పురోగతికి ప్రాధాన్యమిచ్చారు.
భారత వ్యవసాయ రంగంలో విప్లవాత్మక మార్పులకు బాటలు వేసిన నాయకుల్లో సి. సుబ్రహ్మణ్యం ఒకరు. దేశంలో హరిత విప్లవానికి పునాదులు వేయడంలో ఆయన పాత్ర ఎంతో కీలకమైంది. ఆహార ధాన్యాల ఉత్పత్తిని పెంచి, దేశం ఆహార కొరత నుంచి బయటపడేందుకు అవసరమైన విధానాలు, కార్యక్రమాలకు ఆయన విశేషంగా కృషి చేశారు. వ్యవసాయ రంగాన్ని బలోపేతం చేయాలన్న ఆయన దూరదృష్టి దేశ ఆహార భద్రతకు గట్టి పునాది వేసింది.
అదేవిధంగా పాల ఉత్పత్తి రంగంలోనూ ఆయన కృషి చిరస్మరణీయమని ఉపరాష్ట్రపతి పేర్కొన్నారు. శ్వేత విప్లవానికి బాటలు వేసిన ప్రయత్నాల్లో ఆయన పాత్రను గుర్తుచేశారు. పాల ఉత్పత్తి, పాడి పరిశ్రమ అభివృద్ధికి అనుకూలమైన పరిస్థితులు ఏర్పడటంతో భారత్‌ ప్రపంచంలోనే అత్యధిక పాల ఉత్పత్తి చేసే దేశంగా ఎదిగేందుకు పునాది పడింది. వ్యవసాయం, పాడి పరిశ్రమ రంగాల్లో ఆయన ఆలోచనలు దేశ ఆర్థిక, సామాజిక అభివృద్ధికి దోహదపడ్డాయని కొనియాడారు. సి. సుబ్రహ్మణ్యం దేశానికి అందించిన సేవలు తరతరాలకు స్ఫూర్తినిస్తాయని ఉపరాష్ట్రపతి పేర్కొన్నారు. త్యాగం, సమగ్రత, దేశభక్తి వంటి విలువలను ఆచరణలో చూపిన ఆయన జీవితం ప్రజాసేవలో ఉన్నవారికి ఆదర్శమని గుర్తుచేశారు. దేశ ఆహార భద్రతను పటిష్ఠం చేయడం నుంచి పాల ఉత్పత్తి రంగాన్ని ప్రపంచ స్థాయికి తీసుకెళ్లే మార్గం సుగమం చేయడం వరకు ఆయన చేసిన కృషిని కృతజ్ఞతతో స్మరించుకుంటూ నివాళులర్పించారు.