భారత్‌ సమ్మిట్‌కు కర్ణాటక ముఖ్యమంత్రి శివకుమార్‌కు భట్టి ఆహ్వానం
* బెంగళూరులో వ్యక్తిగతంగా ఆహ్వానించిన ఉప ముఖ్యమంత్రి
* నవంబర్‌ 13, 14 తేదీల్లో హైదరాబాద్‌లో రెండో విడత సమ్మిట్‌
* ప్రియాంక్‌ ఖర్గే సహా పలువురు నేతలతో భేటీ
* సామాజిక న్యాయం, సమానత్వం, సమ్మిళిత అభివృద్ధిపై చర్చ
హైదరాబాద్‌, నవంబర్‌ 12 (సేనాని ప్రతినిధి): హైదరాబాద్‌లో ఈ నెల 13, 14 తేదీల్లో నిర్వహించనున్న రెండో విడత భారత్‌ సమ్మిట్‌కు హాజరుకావాలని కర్ణాటక ముఖ్యమంత్రి డీకే శివకుమార్‌ను తెలంగాణ ఉప ముఖ్యమంత్రి భట్టి విక్రమార్క ఆహ్వానించారు. బెంగళూరులో శివకుమార్‌తో భేటీ అయిన భట్టి విక్రమార్క సమ్మిట్‌కు సంబంధించిన ఆహ్వానాన్ని వ్యక్తిగతంగా అందజేశారు. హైదరాబాద్‌లో జరగనున్న ఈ అంతర్జాతీయ సమావేశానికి వివిధ రంగాలకు చెందిన ప్రముఖులు, నాయకులు హాజరుకానున్న నేపథ్యంలో కర్ణాటక ముఖ్యమంత్రిని ఆహ్వానించడం ప్రాధాన్యం సంతరించుకుంది. ఈ సందర్భంగా ఇరువురు నేతలు భారత్‌ సమ్మిట్‌ నిర్వహణ, దాని ప్రధాన లక్ష్యాలపై చర్చించారు. సామాజిక న్యాయం, సమానత్వం, సమ్మిళిత అభివృద్ధి వంటి అంశాలే సమ్మిట్‌ ప్రధాన ఆశయాలని భట్టి విక్రమార్క వివరించారు. సమాజంలోని అన్ని వర్గాలకు సమాన అవకాశాలు కల్పించడం, అభివృద్ధి ఫలాలు అందరికీ చేరేలా చూడడం వంటి అంశాలపై ఉమ్మడి నిబద్ధతను ఈ సమావేశం ప్రతిబింబించిందని తెలిపారు.
బెంగళూరు పర్యటనలో భాగంగా కర్ణాటక మంత్రి ప్రియాంక్‌ ఖర్గే, కృష్ణబ గౌడ, రాజీవ్‌ గౌడ, గుర్దీప్‌ సప్పల్‌తోనూ భట్టి విక్రమార్క సమావేశమయ్యారు. వారితో వివిధ అంశాలపై మాట్లాడారు. భారత్‌ సమ్మిట్‌ లక్ష్యాలు, సామాజిక న్యాయం, సమానత్వం, సమ్మిళిత అభివృద్ధి దిశగా చేపట్టాల్సిన కార్యక్రమాలపై అభిప్రాయాలు పంచుకున్నారు.
ఈ నెల 13, 14 తేదీల్లో హైదరాబాద్‌లో జరగనున్న రెండో భారత్‌ సమ్మిట్‌కు దేశ, విదేశాల నుంచి ప్రతినిధులు హాజరుకానున్నారు. సమాజంలో సమానత్వం, సామాజిక న్యాయం, ప్రజాస్వామ్య విలువలు, సమ్మిళిత అభివృద్ధి వంటి అంశాలపై చర్చలకు ఈ వేదిక ప్రాధాన్యం ఇవ్వనుంది. వివిధ రాష్ట్రాలకు చెందిన నాయకులు, ప్రతినిధుల భాగస్వామ్యంతో విస్తృత స్థాయిలో చర్చలు నిర్వహించేందుకు ఏర్పాట్లు చేస్తున్నారు. బెంగళూరులో తనకు సమయం కేటాయించి సమావేశమైన డీకే శివకుమార్‌తో పాటు ఇతర నేతలకు భట్టి విక్రమార్క కృతజ్ఞతలు తెలిపారు. భారత్‌ సమ్మిట్‌లో పాల్గొనేందుకు హైదరాబాద్‌కు రావాలని వారిని ఆహ్వానించారు. సమ్మిట్‌లో వారి భాగస్వామ్యం చర్చలకు మరింత విస్తృతిని తీసుకువస్తుందని ఆశాభావం వ్యక్తం చేశారు. హైదరాబాద్‌లో వారికి స్వాగతం పలికేందుకు ఎదురుచూస్తున్నట్లు భట్టి విక్రమార్క తెలిపారు.