15 Oct 2025 (senani.net): స్వదేశంలో వెస్టిండీస్‌తో జరిగిన రెండు మ్యాచ్‌ల టెస్టు సిరీస్‌ను భారత జట్టు 2-0తో సునాయాసంగా కైవసం చేసుకుంది. ఐదో రోజు ఉదయం సెషన్‌లో 121 పరుగుల లక్ష్యాన్ని పెద్దగా ఒత్తిడి లేకుండానే ఛేదిస్తూ టీమ్‌ఇండియా విజయం నమోదు చేసింది. కేఎల్‌ రాహుల్‌ మరోసారి అద్భుత ఫామ్‌లో రాణించి 58 నాటౌట్‌తో నిలిచాడు. సాయి, శుభ్‌మన్‌ గిల్‌ వికెట్లు త్వరగా కోల్పోయినా ధ్రువ్‌ జురెల్‌ సహకారంతో రాహుల్‌ మ్యాచ్‌ను ముగించాడు. ఈ మ్యాచ్‌లో 8 వికెట్లు తీసిన కుల్‌దీప్‌ యాదవ్‌కు ప్లేయర్‌ ఆఫ్‌ ది మ్యాచ్‌ అవార్డు దక్కగా, సిరీస్‌లో కీలక పాత్ర పోషించిన రవీంద్ర జడేజాకు ప్లేయర్‌ ఆఫ్‌ ది సిరీస్‌ గౌరవం లభించింది. స్వదేశంలో కెప్టెన్‌గా గిల్‌ తొలి సిరీస్‌నే క్లీన్‌స్వీప్‌ చేయడం విశేషంగా నిలిచింది.
విజయానికి 63/1 ఓవర్‌నైట్‌ స్కోరుతో ఐదో రోజు ఆటను ప్రారంభించిన భారత్‌లో సాయి, గిల్‌ ఔట్‌ అయినా రాహుల్‌ దూకుడుగా ఆడుతూ సిక్స్‌లు, ఫోర్లతో స్కోర్‌ను వేగంగా ముందుకు నడిపించాడు. వారికన్‌ బౌలింగ్‌లో హాఫ్‌ సెంచరీ పూర్తి చేసి అదే ఓవర్లో విజయం సాధించాడు. ఇదే వెస్టిండీస్‌పై భారత్‌కు వరుసగా పదో సిరీస్‌ విజయం కావడం గమనార్హం. 2002 నుంచి ఇప్పటివరకు విండీస్‌పై ఒక్క టెస్టు కూడా భారత్ చేతులెత్తలేదు. ఈ విజయంతో వరల్డ్‌ టెస్ట్‌ చాంపియన్‌షిప్‌లో భారత్ 12 కీలక పాయింట్లు కూడబెట్టుకుంది. గిల్‌ సేన ఇప్పటి వరకు 7 మ్యాచ్‌లలో 52 పాయింట్లు అందుకుని మూడో స్థానంలో ఉంది. ఇక పిచ్‌పై అసంతృప్తి వ్యక్తం చేసిన కోచ్‌ గౌతం గంభీర్‌ భవిష్యత్తులో బ్యాటింగ్‌, బౌలింగ్‌కు సమానంగా అనుకూలించే వికెట్లు కావాలని పేర్కొన్నాడు. కోట్లా పిచ్‌ సంప్రదాయంగా స్పిన్‌కు అనుకూలమైనప్పటికీ ఈ సారి పేసర్లకు కూడా అవకాశాలు ఇవ్వాల్సిందని అభిప్రాయపడ్డాడు. భారత్ బౌలర్లు 20 వికెట్లు పడగొట్టగా అందులో 13 వికెట్లు స్పిన్నర్ల ఖాతాలో పడ్డాయి.
సేనాని (senani.net): విజయం పరిపూర్ణం.. విండీస్‌పై సిరీస్‌ను క్లీన్‌స్వీప్‌ చేసిన భారత్
