గండిపేట కాండ్యూట్‌కు వేగంగా మరమ్మతులు!
- – 36 గంటల పాటు కొనసాగుతున్న పనులు
- – గడువుకు ముందే పూర్తి చేసేందుకు అధికారుల చర్యలు
- – లీకేజీలు పునరావృతం కాకుండా శాశ్వత పరిష్కారం
- – ప్రభావిత ప్రాంతాలకు ట్యాంకర్ల ద్వారా తాగునీరు
హైదరాబాద్, నవంబర్ 3 (సేనాని ప్రతినిధి): హైదరాబాద్ నగరానికి గండిపేట (ఉస్మాన్‌సాగర్) నుంచి తాగునీటిని సరఫరా చేసే వందేళ్లకు పైగా పురాతనమైన రాతి నిర్మాణ కాండ్యూట్‌పై మరమ్మతు పనులు చురుగ్గా కొనసాగుతున్నాయి. సబ్జా కాలనీ, టోలిచౌకి, మణికొండ ప్రాంతాల్లో ఏర్పడిన లీకేజీలను అరికట్టేందుకు జలమండలి అధికారులు ప్రత్యేక చర్యలు చేపట్టారు. నవంబర్ 3వ తేదీ మంగళవారం ఉదయం 6 గంటల నుంచి నవంబర్ 4వ తేదీ బుధవారం సాయంత్రం 6 గంటల వరకు మొత్తం 36 గంటల పాటు నీటి సరఫరా వ్యవస్థను నిలిపివేసి మరమ్మతులు చేపడుతున్నారు. ఈ పనులను నిర్ణీత గడువు కంటే ముందుగానే పూర్తి చేసి ప్రభావిత ప్రాంతాలకు తాగునీటి సరఫరాను పునరుద్ధరించడమే లక్ష్యంగా అధికారులు పనిచేస్తున్నారు. రోజుకు 20 మిలియన్ గ్యాలన్ల నీటిని తరలించే సామర్థ్యం కలిగిన ఈ పురాతన కాండ్యూట్‌పై లీకేజీల మరమ్మతులను వేగవంతం చేశారు. నిర్మాణం వందేళ్లకు పైగా పాతది కావడంతో పనుల నిర్వహణలో ప్రత్యేక జాగ్రత్తలు తీసుకుంటున్నారు. మరమ్మతుల సమయంలో రాతి నిర్మాణానికి ఎలాంటి అదనపు నష్టం కలగకుండా సాంకేతిక నిపుణుల పర్యవేక్షణలో పనులు చేపడుతున్నారు. లీకేజీలు ఉన్న ప్రాంతాలను గుర్తించి అవసరమైన మరమ్మతులు చేయడంతో పాటు, భవిష్యత్తులో ఇదే సమస్య మళ్లీ తలెత్తకుండా పటిష్ఠమైన చర్యలు తీసుకోవాలని అధికారులు నిర్ణయించారు.
ఈ సందర్భంగా జలమండలి ఎండీ కె. అశోక్ రెడ్డి అధికారులకు పలు సూచనలు చేశారు. పురాతనమైన కాండ్యూట్ కావడంతో మరమ్మతుల విషయంలో నాణ్యతా ప్రమాణాలను తప్పనిసరిగా పాటించాలని ఆదేశించారు. తాత్కాలిక మరమ్మతులతో సరిపెట్టకుండా లీకేజీలకు శాశ్వత పరిష్కారం చూపాలని స్పష్టం చేశారు. నిర్ణీత గడువు కంటే ముందుగానే పనులు పూర్తి చేసేందుకు అవసరమైన సిబ్బంది, యంత్రాలు, సాంకేతిక వనరులను సమర్థంగా వినియోగించుకోవాలని సూచించారు. పనుల పురోగతిని నిరంతరం పర్యవేక్షిస్తూ ఎలాంటి జాప్యం జరగకుండా చూడాలని తెలిపారు.
మరమ్మతుల కారణంగా తాగునీటి సరఫరాకు అంతరాయం ఏర్పడిన ప్రాంతాల్లో ప్రజలకు ఇబ్బందులు కలగకుండా ట్యాంకర్ల ద్వారా నీటిని అందించాలని ఎండీ ఆదేశించారు. ముఖ్యంగా నీటి సరఫరా, నిర్వహణ విభాగాల అధికారులు పరస్పర సమన్వయంతో పనిచేయాలని సూచించారు. ప్రభావిత ప్రాంతాల్లో నీటి అవసరాలను ఎప్పటికప్పుడు గుర్తించి, అందుకు అనుగుణంగా ట్యాంకర్లను అందుబాటులో ఉంచాలని తెలిపారు. నగరానికి వివిధ జలవనరుల నుంచి ప్రతిరోజూ సుమారు 560 మిలియన్ గ్యాలన్ల తాగునీరు సరఫరా అవుతుండగా, ప్రస్తుత నిలిపివేత గండిపేటకు సంబంధించిన 20 మిలియన్ గ్యాలన్ల సామర్థ్యం గల కాండ్యూట్‌కు మాత్రమే పరిమితమని జలమండలి స్పష్టం చేసింది. కృష్ణా, గోదావరి, సింగూరు, మంజీరా జలవనరుల నుంచి నీటి సరఫరా యథావిధిగా కొనసాగుతుందని తెలిపింది. మరమ్మతు పనులు పూర్తయిన వెంటనే ప్రభావిత ప్రాంతాలకు తాగునీటి సరఫరాను పునరుద్ధరించేందుకు అన్ని ఏర్పాట్లు చేస్తున్నట్లు జలమండలి వెల్లడించింది. పనుల నాణ్యతతో పాటు ప్రజలకు కలిగే అసౌకర్యాన్ని తగ్గించడానికీ సమాన ప్రాధాన్యం ఇవ్వాలని ఎండీ అధికారులకు సూచించారు. వివిధ విభాగాల మధ్య సమన్వయం కొనసాగిస్తూ పనులను వేగంగా పూర్తి చేయాలని ఆదేశించారు. అప్పటివరకు వినియోగదారులు అందుబాటులో ఉన్న నీటిని పొదుపుగా వినియోగించుకోవాలని జలమండలి విజ్ఞప్తి చేసింది.