మోదీతో జెలెన్‌స్కీ ఫోన్‌ సంభాషణ
- – రష్యా–ఉక్రెయిన్‌ యుద్ధంపై చర్చ
- శాంతి ప్రయత్నాలకు భారత్‌ మద్దతు
- – చర్చలు, దౌత్యమే పరిష్కార మార్గమని స్పష్టీకరణ
- – ద్వైపాక్షిక సంబంధాల బలోపేతంపైనా చర్చ
న్యూఢిల్లీ, నవంబర్ 9 (సేనాని ప్రతినిధి): రష్యా–ఉక్రెయిన్‌ యుద్ధం కొనసాగుతున్న నేపథ్యంలో భారత ప్రధాని నరేంద్ర మోదీ, ఉక్రెయిన్‌ అధ్యక్షుడు వొలోదిమిర్‌ జెలెన్‌స్కీతో ఫోన్‌లో మాట్లాడారు. యుద్ధానికి శాంతియుత పరిష్కారం కనుగొనేందుకు భారత్‌ అన్ని విధాలా సహకరించేందుకు సిద్ధంగా ఉందని ఈ సందర్భంగా మోదీ స్పష్టం చేశారు. ఇరు దేశాల మధ్య ఘర్షణలు కొనసాగుతూ అంతర్జాతీయంగా సంక్లిష్ట పరిస్థితులు నెలకొన్న వేళ జరిగిన ఈ సంభాషణకు ప్రాధాన్యం ఏర్పడింది. ఈ మేరకు ప్రధానమంత్రి కార్యాలయం ప్రకటన విడుదల చేసింది.
ఫోన్‌ సంభాషణ సందర్భంగా రష్యా–ఉక్రెయిన్‌ ఘర్షణలకు సంబంధించిన తాజా పరిణామాలను జెలెన్‌స్కీ ప్రధాని మోదీకి వివరించారు. యుద్ధం కారణంగా నెలకొన్న పరిస్థితులు, శాంతి సాధనకు ఎదురవుతున్న సవాళ్లపై ఇరువురు నేతలు చర్చించినట్లు ప్రధానమంత్రి కార్యాలయం వెల్లడించింది. యుద్ధ పరిణామాలపై భారత్‌ ఎప్పటికప్పుడు దృష్టి సారిస్తోందని, సమస్యకు పరిష్కారం కనుగొనే ప్రయత్నాలకు మద్దతు కొనసాగిస్తుందని మోదీ ఈ సందర్భంగా పేర్కొన్నారు. యుద్ధాన్ని ముగించేందుకు చర్చలు, దౌత్య మార్గాలే సరైన పరిష్కారమని భారత్‌ మొదటి నుంచీ చెబుతోందని మోదీ జెలెన్‌స్కీకి గుర్తుచేశారు. ఆయుధ ఘర్షణల ద్వారా కాకుండా పరస్పర చర్చలతోనే శాంతి సాధ్యమవుతుందని భారతదేశ స్థిరమైన వైఖరిని మరోసారి స్పష్టం చేశారు. శాంతియుత పరిష్కారాన్ని కనుగొనే దిశగా చేపట్టే అన్ని ప్రయత్నాలకు భారత్‌ మద్దతు ఇస్తుందని హామీ ఇచ్చారు.
రష్యాతో యుద్ధాన్ని ముగించి శాంతి దిశగా ముందుకు సాగేందుకు అవసరమైన ప్రయత్నాలకు భారత్‌ సహకరించేందుకు సిద్ధంగా ఉందని మోదీ తెలిపారు. అంతర్జాతీయంగా శాంతి, స్థిరత్వం నెలకొనడం అత్యంత ముఖ్యమని భారతదేశం భావిస్తున్న నేపథ్యంలో ఈ సంభాషణ ప్రాధాన్యం సంతరించుకుంది. యుద్ధం ముగింపు దిశగా జరిగే ప్రయత్నాల్లో చర్చలు, దౌత్యానికి ప్రాధాన్యం ఇవ్వాలన్న భారత్‌ అభిప్రాయాన్ని ప్రధాని మరోసారి స్పష్టం చేశారు. ఇదే సమయంలో భారత్‌–ఉక్రెయిన్‌ మధ్య ద్వైపాక్షిక సంబంధాలను మరింత బలోపేతం చేసుకునే అంశంపైనా ఇరువురు నేతలు చర్చించారు. వివిధ రంగాల్లో ఇరు దేశాల ప్రజల ఉమ్మడి ప్రయోజనాలకు అనుగుణంగా సహకారాన్ని విస్తరించేందుకు తీసుకోవాల్సిన చర్యలపై అభిప్రాయాలు పంచుకున్నారు. యుద్ధ పరిస్థితుల మధ్య కూడా పరస్పర సంబంధాలను కొనసాగిస్తూ, శాంతి సాధనకు తోడ్పడే దిశగా భారత్‌ తన వైఖరిని పునరుద్ఘాటించింది.