ములుగు అభివృద్ధికి పర్యావరణ పర్యాటకాన్ని ప్రోత్సహించాలి

* జయేశ్‌ రంజన్‌తో మంత్రి సీతక్క సమీక్ష
* ప్రకృతి పరిరక్షణతో గిరిజనులకు ఉపాధి
* యువతకు ఉద్యోగ అవకాశాలు కల్పించాలి
* ఏజెన్సీ గ్రామాల్లో మౌలిక వసతుల కల్పనకు ప్రాధాన్యం

ములుగు, నవంబర్‌ 7 (సేనాని ప్రతినిధి): ములుగు జిల్లాలో అటవీ సంపదను పరిరక్షిస్తూనే పర్యావరణ పర్యాటకాన్ని అభివృద్ధి చేయాలని మంత్రి సీతక్క సూచించారు. అటవీ, పర్యావరణ శాఖ ప్రత్యేక ప్రధాన కార్యదర్శి జయేశ్‌ రంజన్‌ తొలిసారిగా ములుగు జిల్లాకు వచ్చిన సందర్భంగా జిల్లా కలెక్టరేట్‌లో నిర్వహించిన సమీక్షలో ఆమె పాల్గొన్నారు. జిల్లాలో ప్రకృతి వనరులు, పర్యాటక అవకాశాలను వినియోగించుకుంటూ స్థానిక ప్రజలకు ప్రయోజనం చేకూర్చేలా ప్రణాళికలు రూపొందించాలని కోరారు. పర్యావరణ పర్యాటకాన్ని ప్రోత్సహించడం ద్వారా ఆదివాసీ గిరిజనులకు జీవనోపాధి అవకాశాలు కల్పించవచ్చని మంత్రి సీతక్క పేర్కొన్నారు. స్థానిక యువతకు ఉపాధి కల్పించేలా పర్యాటక రంగాన్ని తీర్చిదిద్దాలని సూచించారు. అటవీ ప్రాంతాల సహజ స్వరూపానికి నష్టం కలగకుండా, పర్యావరణ సమతుల్యతను కాపాడుతూ పర్యాటక ప్రాంతాలను అభివృద్ధి చేయాలని తెలిపారు. స్థానిక గిరిజనుల భాగస్వామ్యంతో చేపట్టే కార్యక్రమాలు వారికి ఆర్థికంగా అండగా నిలుస్తాయని అభిప్రాయపడ్డారు.
అటవీ సంరక్షణకు ప్రాధాన్యమిస్తూనే ఏజెన్సీ గ్రామాల్లో కనీస మౌలిక సదుపాయాలు కల్పించాల్సిన అవసరం ఉందని సీతక్క స్పష్టం చేశారు. మారుమూల గ్రామాలకు రహదారులు, తాగునీరు, విద్యుత్‌ సౌకర్యాలు అందించాలని కోరారు. గిరిజన చిన్నారులకు నాణ్యమైన విద్య అందించేందుకు పాఠశాలలు, ప్రజలకు మెరుగైన వైద్యం అందించేందుకు ఆరోగ్య కేంద్రాలు అందుబాటులోకి తీసుకురావాలని సూచించారు. అభివృద్ధి ఫలాలు అటవీ ప్రాంతాల్లో నివసించే ప్రతి గిరిజన కుటుంబానికి చేరేలా చర్యలు తీసుకోవాలని పేర్కొన్నారు.
ఏజెన్సీ గ్రామాల్లో అభివృద్ధి పనులకు అవసరమైన కేంద్ర అటవీ అనుమతుల విషయంలో జాప్యం జరగకుండా చూడాలని మంత్రి కోరారు. రహదారులు, తాగునీరు, విద్యుత్‌ వంటి అత్యవసర పనులు అనుమతుల కారణంగా నిలిచిపోకుండా సంబంధిత శాఖలు సమన్వయంతో వ్యవహరించాలని సూచించారు. అటవీ చట్టాలు, పర్యావరణ నిబంధనలను పాటిస్తూనే ప్రజల అవసరాలకు అనుగుణంగా అభివృద్ధి కార్యక్రమాలను వేగవంతం చేయాలని అన్నారు.
ములుగు జిల్లాలో అటవీ పరిరక్షణ, గిరిజన సంక్షేమం, అభివృద్ధి సమాంతరంగా సాగాలని సీతక్క పేర్కొన్నారు. ప్రకృతి సంపదను భావితరాలకు అందించే బాధ్యతను గుర్తుంచుకుంటూనే ప్రస్తుత తరానికి మెరుగైన జీవన సదుపాయాలు కల్పించాల్సి ఉందన్నారు. పర్యావరణ పర్యాటకం ద్వారా గిరిజన కుటుంబాలకు ఆదాయం, యువతకు ఉపాధి అవకాశాలు పెరిగేలా కార్యాచరణ రూపొందించాలని సూచించారు. జిల్లా సమగ్ర అభివృద్ధికి అన్ని శాఖలు సమన్వయంతో పనిచేయాలని కోరారు.