నల్లగొండను సూపర్ స్మార్ట్ సిటీగా తీర్చిదిద్దుతాం

• – రూ.2 వేల కోట్లతో రహదారుల విస్తరణ
• – జీ+3 విధానంలో పేదలకు ఇందిరమ్మ ఇళ్లు
• – ఏడాదిన్నరలో ప్రతి ఇంటికీ నిరంతర తాగునీరు
• – రూ.27.50 కోట్ల అభివృద్ధి పనులకు శంకుస్థాపన

నల్లగొండ, నవంబర్ 5 (సేనాని ప్రతినిధి): నల్లగొండను సూపర్ స్మార్ట్ సిటీగా తీర్చిదిద్దడమే లక్ష్యంగా అభివృద్ధి పనులను వేగవంతం చేస్తున్నామని రాష్ట్ర మంత్రి కోమటిరెడ్డి వెంకటరెడ్డి తెలిపారు. జిల్లాలో మౌలిక సదుపాయాల కల్పనకు పెద్దపీట వేస్తూ రూ.2 వేల కోట్లతో రెండు వరుసల రహదారుల విస్తరణ చేపడుతున్నట్లు వెల్లడించారు. పేదల సొంతింటి కలను నెరవేర్చేందుకు జీ+3 విధానంలో ఇందిరమ్మ ఇళ్ల నిర్మాణం చేపడుతున్నామని చెప్పారు. ప్రజలకు మెరుగైన సౌకర్యాలు కల్పించి వారి జీవన ప్రమాణాలను పెంచడమే ప్రభుత్వ లక్ష్యమని పేర్కొన్నారు. రాబోయే ఏడాదిన్నరలో నల్లగొండలోని ప్రతి ఇంటికీ 24 గంటల పాటు నిరంతర తాగునీరు అందించేలా ప్రణాళికలు రూపొందిస్తున్నట్లు మంత్రి వెల్లడించారు. నీటి సరఫరా వ్యవస్థను పటిష్ఠం చేసి ప్రజలకు ఎలాంటి ఇబ్బందులు లేకుండా చర్యలు తీసుకుంటున్నామని తెలిపారు. నగరంతో పాటు జిల్లాలోని వివిధ ప్రాంతాల్లో రహదారులు, తాగునీరు, గృహ నిర్మాణం వంటి మౌలిక సదుపాయాల అభివృద్ధికి ప్రాధాన్యం ఇస్తున్నట్లు వివరించారు.
ప్రజలకు ప్రభుత్వ సేవలు మరింత చేరువగా, వేగంగా అందించాలనే ఉద్దేశంతో నల్లగొండలో రూ.17.50 కోట్ల వ్యయంతో నిర్మించనున్న సమీకృత మండల కార్యాలయాల భవన సముదాయానికి మంత్రి శంకుస్థాపన చేశారు. వివిధ ప్రభుత్వ శాఖల సేవలు ఒకేచోట అందుబాటులోకి రావడంతో ప్రజలకు కార్యాలయాల చుట్టూ తిరిగే ఇబ్బందులు తగ్గుతాయని భావిస్తున్నారు. పరిపాలనా వ్యవస్థను మరింత సమర్థంగా నిర్వహించేందుకు ఈ భవన సముదాయం ఉపయోగపడుతుందని మంత్రి పేర్కొన్నారు. అదేవిధంగా మామిళ్లగూడ మీదుగా కతాల్‌గూడ నుంచి రాజీవ్ స్వగృహ వరకు రహదారి అభివృద్ధి పనులకు రూ.10 కోట్లతో శంకుస్థాపన చేశారు. ఈ రహదారి అభివృద్ధి పూర్తయితే ఆయా ప్రాంతాల ప్రజలకు రాకపోకలు సులభతరం కావడంతో పాటు రవాణా సౌకర్యాలు మెరుగుపడనున్నాయి. మొత్తం రూ.27.50 కోట్ల వ్యయంతో చేపట్టనున్న ఈ రెండు పనులు నల్లగొండ అభివృద్ధిలో కీలకంగా నిలుస్తాయని మంత్రి అభిప్రాయపడ్డారు.
నల్లగొండ సమగ్ర అభివృద్ధికి అవసరమైన అన్ని మౌలిక సదుపాయాలను దశలవారీగా కల్పిస్తామని కోమటిరెడ్డి వెంకటరెడ్డి స్పష్టం చేశారు. రహదారుల విస్తరణ, ఇందిరమ్మ ఇళ్ల నిర్మాణం, నిరంతర తాగునీటి సరఫరా, ప్రభుత్వ కార్యాలయాల ఆధునికీకరణకు ప్రాధాన్యం ఇస్తున్నట్లు తెలిపారు. అభివృద్ధి పనులను ప్రణాళికాబద్ధంగా పూర్తి చేసి ప్రజలకు మెరుగైన జీవన సౌకర్యాలు అందించేందుకు ప్రభుత్వం కట్టుబడి ఉందని పేర్కొన్నారు.