పరిశుభ్ర హైదరాబాద్‌.. ట్రాఫిక్‌ రహిత నగరమే లక్ష్యం
- – చెత్త సేకరణలో నిర్లక్ష్యం వహిస్తే కఠిన చర్యలు
- – శుద్ధి చేసిన నీటితో తాగునీటి ఆదాకు చర్యలు
- – అండర్‌పాస్‌లు, ఎలివేటెడ్‌ మార్గాల నిర్మాణానికి ప్రణాళికలు
- – సీఎం రేవంత్ రెడ్డి
హైదరాబాద్‌, నవంబర్‌ 2 (సేనాని ప్రతినిధి): హైదరాబాద్‌ను పరిశుభ్రమైన నగరంగా, ట్రాఫిక్‌ రహిత నగరంగా తీర్చిదిద్దాలని ముఖ్యమంత్రి ఎ. రేవంత్ రెడ్డి అధికారులను ఆదేశించారు. నగరంలో ఎక్కడా చెత్త కనిపించకుండా చర్యలు తీసుకోవాలని, చెత్త సేకరణపై నిరంతర పర్యవేక్షణ ఉండాలని స్పష్టం చేశారు. జూబ్లీహిల్స్‌లోని తన నివాసంలో మున్సిపల్‌ శాఖ అధికారులతో వివిధ అంశాలపై సమీక్ష నిర్వహించారు. ప్రతిరోజూ ప్రతి ఇంటి నుంచి చెత్త సేకరణ జరిగేలా అవసరమైన ఏర్పాట్లు చేయాలని సూచించారు. విధుల్లో నిర్లక్ష్యం వహించే అధికారులు, సిబ్బందిపై కఠిన చర్యలు తీసుకోవాలని ఆదేశించారు. నగర పరిశుభ్రత విషయంలో రాజీ పడకుండా ప్రజలకు మెరుగైన పారిశుధ్య సేవలు అందించాలని పేర్కొన్నారు.
నిర్మాణ వ్యర్థాల సేకరణ, తరలింపునకు ప్రత్యేక ఏర్పాట్లు చేయాలని ముఖ్యమంత్రి సూచించారు. భవన నిర్మాణాల నుంచి వెలువడే వ్యర్థాలను రోడ్లపై, ఖాళీ స్థలాల్లో పడేయకుండా నిర్దిష్ట విధానంలో తరలించేలా చర్యలు చేపట్టాలన్నారు. మున్సిపల్‌ పరిధిలోని పారిశ్రామిక ప్రాంతాల్లో చెత్త సేకరణను సమర్థంగా నిర్వహించేందుకు పారిశ్రామిక స్థానిక సంస్థల అధికారులతో సమన్వయం చేసుకోవాలని సూచించారు. పారిశ్రామిక ప్రాంతాల్లోనూ పారిశుధ్య నిర్వహణకు ప్రత్యేక ప్రణాళిక రూపొందించాలని తెలిపారు. నగరంలోని ప్రధాన రహదారులు, అంతర్గత వీధులు, బహిరంగ ప్రదేశాలు నిరంతరం పరిశుభ్రంగా ఉండేలా పర్యవేక్షణ వ్యవస్థను బలోపేతం చేయాలని అధికారులకు దిశానిర్దేశం చేశారు.
నగరంలో నిర్మాణ పనులు, పార్కుల నిర్వహణ, పచ్చదనం పెంపు, తోటల సంరక్షణ వంటి అవసరాలకు మురుగునీటి శుద్ధి కేంద్రాల్లో శుద్ధి చేసిన నీటిని వినియోగించేలా ప్రజల్లో అవగాహన కల్పించాలని రేవంత్ రెడ్డి సూచించారు. నిర్మాణ రంగం, ఉద్యానవనాల నిర్వహణ, పార్కుల అభివృద్ధి కోసం తాగునీటిని వినియోగించడం వల్ల విలువైన తాగునీటి వనరులపై ఒత్తిడి పెరుగుతోందని పేర్కొన్నారు. దీనికి ప్రత్యామ్నాయంగా శుద్ధి చేసిన నీటిని వినియోగిస్తే తాగునీటిని ఆదా చేయవచ్చని అభిప్రాయపడ్డారు. జలమండలి తొలివిడతలో 19 మురుగునీటి శుద్ధి కేంద్రాల నుంచి 28 హరిత జల ట్యాంకర్ల ద్వారా సేవలను అందుబాటులోకి తీసుకొచ్చిందని గుర్తుచేశారు. ఈ సేవలను మరింత విస్తృతంగా వినియోగించుకునేలా చర్యలు చేపట్టాలని ఆదేశించారు.
మహానగర పాలక సంస్థతో పాటు సైబరాబాద్‌, మల్కాజిగిరి మున్సిపల్‌ కార్పొరేషన్ల పరిధిలోనూ శుద్ధి చేసిన నీటి సరఫరాను విస్తరించాలని ముఖ్యమంత్రి సూచించారు. హరిత జల ట్యాంకర్ల సేవలపై నిర్మాణ సంస్థలు, పార్కుల నిర్వహణ సంస్థలు, ఇతర అవసరాలకు నీటిని వినియోగించే వారికి అవగాహన కల్పించాలన్నారు. శుద్ధి చేసిన నీరు అందుబాటులో ఉన్న ప్రాంతాల్లో తాగునీటిని అనవసరంగా వినియోగించకుండా చూడాలని పేర్కొన్నారు. ఈ విధానం ద్వారా ఒకవైపు తాగునీటి ఆదా, మరోవైపు మురుగునీటి పునర్వినియోగం సాధ్యమవుతుందని తెలిపారు. నగరాన్ని పచ్చదనంతో నింపేందుకు చేపట్టే కార్యక్రమాల్లోనూ ఈ నీటిని సద్వినియోగం చేసుకోవాలని అధికారులకు సూచించారు.
హైదరాబాద్‌లో పెరుగుతున్న ట్రాఫిక్‌ సమస్యకు శాశ్వత పరిష్కారం చూపి నగరాన్ని ట్రాఫిక్‌ రహితంగా తీర్చిదిద్దేందుకు సమగ్ర ప్రణాళికలు సిద్ధం చేయాలని ముఖ్యమంత్రి ఆదేశించారు. వాహనాలు సిగ్నళ్ల వద్ద ఎక్కువసేపు నిలిచిపోకుండా నిరంతరాయంగా రాకపోకలు సాగించేలా చర్యలు చేపట్టాలన్నారు. అవసరమైన ప్రాంతాల్లో అండర్‌పాస్‌లు, పైవంతెన మార్గాల నిర్మాణానికి ప్రతిపాదనలు రూపొందించాలని సూచించారు. రద్దీ ఎక్కువగా ఉండే కూడళ్లు, ప్రధాన రహదారులను గుర్తించి సిగ్నల్‌ రహిత ప్రయాణానికి అనువైన మార్గాలను పరిశీలించాలని తెలిపారు. ఈ సమీక్షలో ఎంపీ వేం నరేందర్‌ రెడ్డితో పాటు హైదరాబాద్‌ మహానగర అభివృద్ధి సంస్థ, మున్సిపల్‌ కార్పొరేషన్ల ఉన్నతాధికారులు పాల్గొన్నారు.