పెట్రోల్‌లో ఇథనాల్‌ మాయాజాలం!
- – రాహుల్‌ గాంధీ సంచలన ఆరోపణలు
- – 20 శాతం పరిమితి దాటినట్లు పరీక్షల్లో వెల్లడి
- – 31.2 శాతం ఇథనాల్‌ ఉన్నట్లు నివేదిక
- – ఆరోపణలను ఖండించిన చమురు సంస్థలు
హైదరాబాద్‌, నవంబర్‌ 7 (సేనాని ప్రతినిధి): పెట్రోల్‌లో ఇథనాల్‌ కలిపే విషయంలో దేశంలోని ప్రధాన చమురు మార్కెటింగ్‌ సంస్థలు నిబంధనలను ఉల్లంఘిస్తూ వినియోగదారులను మోసం చేస్తున్నాయని కాంగ్రెస్‌ అగ్రనేత, లోక్‌సభ ప్రతిపక్ష నాయకుడు రాహుల్‌ గాంధీ సంచలన ఆరోపణలు చేశారు. ప్రభుత్వం నిర్దేశించిన 20 శాతం పరిమితికి మించి పెట్రోల్‌లో ఇథనాల్‌ కలుపుతున్నట్లు కర్ణాటక ప్రభుత్వం నిర్వహించిన ప్రయోగశాల పరీక్షల్లో వెల్లడైందని ఆయన పేర్కొన్నారు. ఈ వ్యవహారంపై సామాజిక మాధ్యమ వేదిక ఎక్స్‌లో స్పందించిన రాహుల్‌ గాంధీ.. ఇరవై శాతం ఇథనాల్‌ మిశ్రమం కాస్తా 420గా మారిందంటూ తీవ్ర విమర్శలు చేశారు. ప్రజలు కొనుగోలు చేస్తున్న పెట్రోల్‌లో అధిక మోతాదులో ఇథనాల్‌ కలపడం ద్వారా వారి వాహనాల నుంచి పెట్రోల్‌ను దొంగిలిస్తున్నట్లేనని వ్యాఖ్యానించారు. చమురు సంస్థలు నిర్వహిస్తున్న నాణ్యతా పరీక్షల్లో పారదర్శకత ఎక్కడుందని ప్రశ్నించారు.
కర్ణాటక ఆహార, పౌర సరఫరాల శాఖ మంత్రి రిజ్వాన్‌ అర్షద్‌ వెల్లడించిన వివరాలు ఈ వివాదానికి ప్రధాన కారణమయ్యాయి. రాష్ట్రంలోని ఏడు జిల్లాల నుంచి సేకరించిన 14 పెట్రోల్‌ నమూనాలను ప్రభుత్వ గుర్తింపు పొందిన ప్రయోగశాలలో పరీక్షించగా, వాటిలో 11 నమూనాల్లో ఇథనాల్‌ శాతం 20కి మించినట్లు తేలిందని ఆయన వెల్లడించారు. ఇండియన్‌ ఆయిల్‌ కార్పొరేషన్‌కు చెందిన నమూనాలో ఏకంగా 31.2 శాతం, హిందుస్థాన్‌ పెట్రోలియం కార్పొరేషన్‌ నమూనాలో 30.5 శాతం ఇథనాల్‌ ఉన్నట్లు పరీక్షా నివేదికల్లో నమోదైందని తెలిపారు. భారత్‌ పెట్రోలియం, నయారా ఎనర్జీ, షెల్‌ సంస్థలకు చెందిన ఇతర నమూనాల్లోనూ 25.5 నుంచి 26.5 శాతం వరకు ఇథనాల్‌ ఉన్నట్లు గుర్తించారని వివరించారు. బెంగళూరు, కోలార్‌, చిక్కబళ్లాపుర, బెంగళూరు గ్రామీణ, రామనగర, మంగళూరు, తుమకూరు జిల్లాల నుంచి ఈ నమూనాలను సేకరించినట్లు పేర్కొన్నారు.
పెట్రోల్‌లో నిర్ణీత పరిమితికి మించి ఇథనాల్‌ కలపడం వల్ల వాహనదారులు తీవ్రంగా నష్టపోయే ప్రమాదం ఉందని మంత్రి రిజ్వాన్‌ అర్షద్‌ ఆందోళన వ్యక్తం చేశారు. ఇథనాల్‌ శాతం పెరిగితే వాహనాల ఇంధన సామర్థ్యం తగ్గి మైలేజీ పడిపోవచ్చని, కొన్ని రకాల వాహనాల్లో ఇంజిన్‌ పనితీరుపై ప్రతికూల ప్రభావం పడే అవకాశం ఉందని పేర్కొన్నారు. తొలుత సేకరించిన నమూనాలను సంబంధిత చమురు సంస్థల ప్రయోగశాలలకు పంపించినప్పటికీ, ఇథనాల్‌ శాతానికి సంబంధించిన పూర్తి వివరాలు వెల్లడించలేదని ఆరోపించారు. దీంతో పరీక్షలపై అనుమానాలు తలెత్తడంతో స్వతంత్ర ప్రభుత్వ గుర్తింపు పొందిన ప్రయోగశాలలో మళ్లీ పరీక్షలు నిర్వహించాల్సి వచ్చిందని వివరించారు. ఈ వ్యవహారంపై సమగ్ర విచారణ జరిపి వాస్తవాలను ప్రజలకు వెల్లడించాలని కాంగ్రెస్‌ నేతలు డిమాండ్‌ చేస్తున్నారు.
అయితే కర్ణాటక ప్రభుత్వం, రాహుల్‌ గాంధీ చేసిన ఆరోపణలను ఇండియన్‌ ఆయిల్‌, భారత్‌ పెట్రోలియం, హిందుస్థాన్‌ పెట్రోలియం సహా పలు చమురు మార్కెటింగ్‌ సంస్థలు తీవ్రంగా ఖండించాయి. కర్ణాటక ప్రభుత్వం సేకరించిన నమూనాల విధానం, వాటిని పరీక్షించిన తీరు నిర్దేశిత నిబంధనలకు అనుగుణంగా లేవని అభ్యంతరం వ్యక్తం చేశాయి. దేశవ్యాప్తంగా 27 రాష్ట్రాలు, కేంద్రపాలిత ప్రాంతాల్లో మొత్తం 893 నమూనాలతో సంయుక్త నాణ్యతా పర్యవేక్షణ పరీక్షలు నిర్వహించామని సంస్థలు వెల్లడించాయి. వీటిలో కర్ణాటకకు చెందిన 56 నమూనాలు కూడా ఉన్నాయని తెలిపాయి. తమ పరీక్షల్లో ఇథనాల్‌ శాతం 19 నుంచి 21 మధ్య నమోదైందని, కర్ణాటక నమూనాల్లో సగటు శాతం 19.3 మాత్రమేనని స్పష్టం చేశాయి. కర్ణాటక ప్రభుత్వ పరీక్షల ఫలితాలు, చమురు సంస్థలు వెల్లడించిన గణాంకాల మధ్య తీవ్ర వ్యత్యాసం ఉండటంతో అసలు వాస్తవాలపై సందిగ్ధత నెలకొంది.
కేంద్ర ప్రభుత్వం ప్రతిష్ఠాత్మకంగా అమలు చేస్తున్న ఇథనాల్‌ మిశ్రమ ఇంధన కార్యక్రమం ఇప్పుడు మరోసారి దేశవ్యాప్తంగా చర్చనీయాంశంగా మారింది. పెట్రోల్‌పై చమురు దిగుమతుల భారాన్ని తగ్గించడం, పర్యావరణ కాలుష్యాన్ని నియంత్రించడం, చెరకు తదితర పంటల నుంచి ఉత్పత్తి చేసే ఇథనాల్‌కు ప్రోత్సాహం కల్పించడం ఈ కార్యక్రమం ప్రధాన లక్ష్యాలుగా ఉన్నాయి. అయితే ఇథనాల్‌ మిశ్రమం వల్ల వాహనాల మైలేజీ, ఇంజిన్‌ సామర్థ్యం, నిర్వహణ వ్యయాలపై ఎలాంటి ప్రభావం పడుతుందనే అంశాలపై వాహనదారుల్లో ఆందోళనలు వ్యక్తమవుతున్నాయి. ఒకవైపు ప్రభుత్వ నిబంధనల ఉల్లంఘన జరిగిందని ప్రతిపక్షాలు ఆరోపిస్తుండగా, మరోవైపు అన్ని పరీక్షల్లో నాణ్యతా ప్రమాణాలు పాటిస్తున్నామని చమురు సంస్థలు చెబుతున్నాయి. ఈ నేపథ్యంలో స్వతంత్రంగా, పారదర్శకంగా పరీక్షలు నిర్వహించి వాస్తవాలను వెల్లడించాల్సిన అవసరం ఉందని వినియోగదారులు అభిప్రాయపడుతున్నారు.