తిరుమల లడ్డూ కల్తీ కేసు బదిలీకి సుప్రీం నిరాకరణ
- – మరో రాష్ట్రానికి విచారణ మార్చాలన్న పిటిషన్‌ కొట్టివేత
- – మహారాష్ట్ర సంస్థ ఎండీ దాఖలు చేసిన వ్యాజ్యం
- – ఏపీలోనే సాక్షులు, ఆధారాలు ఉన్నాయని ధర్మాసనం వ్యాఖ్య
- – సిట్‌ దర్యాప్తును గుర్తుచేసిన సర్వోన్నత న్యాయస్థానం
న్యూఢిల్లీ, నవంబర్ 5 (సేనాని ప్రతినిధి): తిరుమల లడ్డూ తయారీలో ఉపయోగించిన నెయ్యి కల్తీ వ్యవహారానికి సంబంధించిన కేసు విచారణను ఆంధ్రప్రదేశ్‌ వెలుపల మరో రాష్ట్రానికి బదిలీ చేయాలన్న పిటిషన్‌ను సుప్రీంకోర్టు కొట్టివేసింది. విచారణను మహారాష్ట్రకు లేదా మరే ఇతర రాష్ట్రానికి మార్చాలన్న అభ్యర్థనను సర్వోన్నత న్యాయస్థానం తిరస్కరించింది. ఈ మేరకు మహారాష్ట్రకు చెందిన మాల్‌గంగా మిల్క్‌ అండ్‌ ఆగ్రో ప్రొడక్ట్స్‌ ప్రైవేట్‌ లిమిటెడ్‌ సంస్థ మేనేజింగ్‌ డైరెక్టర్‌ మచింద్ర శాంతారామ్‌ లంకే దాఖలు చేసిన బదిలీ పిటిషన్‌పై ప్రధాన న్యాయమూర్తి సూర్యకాంత్‌ నేతృత్వంలోని త్రిసభ్య ధర్మాసనం విచారణ జరిపింది. ఈ కేసులో నిందితుడిగా ఉన్న మచింద్ర శాంతారామ్‌ లంకే తరఫు న్యాయవాది పిటిషన్‌లో పలు అంశాలను ప్రస్తావించారు. ఆంధ్రప్రదేశ్‌లో రాజకీయ నాయకులు ఈ కేసుపై తరచూ ప్రకటనలు చేస్తున్నారని, అలాంటి పరిస్థితులు స్వేచ్ఛాయుతమైన విచారణకు ప్రతికూల వాతావరణాన్ని సృష్టిస్తున్నాయని కోర్టుకు వివరించారు. రాష్ట్రంలో రాజకీయ వాతావరణం ప్రభావం చూపే అవకాశం ఉన్నందున విచారణను మరో రాష్ట్రానికి బదిలీ చేయాలని కోరారు. అయితే ఈ వాదనలతో ధర్మాసనం ఏకీభవించలేదు.
ఈ కేసు దర్యాప్తును సుప్రీంకోర్టు స్వయంగా ఏర్పాటు చేసిన ప్రత్యేక దర్యాప్తు బృందం నిర్వహిస్తున్న విషయాన్ని ధర్మాసనం గుర్తుచేసింది. దర్యాప్తు ప్రక్రియపై ఇప్పటికే సర్వోన్నత న్యాయస్థానం పర్యవేక్షణ, మార్గదర్శకత్వం ఉన్న నేపథ్యంలో మరో రాష్ట్రానికి విచారణను మార్చాల్సిన అవసరం లేదనే అభిప్రాయాన్ని వ్యక్తం చేసింది. ఈ అంశంపై రాజకీయ నాయకులు బహిరంగంగా వ్యాఖ్యలు చేయకూడదని గతంలోనే ఉత్తర్వులు జారీ చేసిన విషయాన్ని కూడా ప్రస్తావించింది.
కేసుకు సంబంధించిన సాక్షులు, సాక్ష్యాధారాల్లో ఎక్కువ భాగం ఆంధ్రప్రదేశ్‌కు చెందినవేనని ధర్మాసనం పేర్కొంది. విచారణకు అవసరమైన ఆధారాలు, సంబంధిత వ్యక్తులు ఏపీలోనే ఉన్న విషయాన్ని పరిగణనలోకి తీసుకోవాలని సూచించింది. కేవలం రాజకీయ నాయకుల ప్రకటనలను కారణంగా చూపుతూ విచారణను మరో రాష్ట్రానికి బదిలీ చేయాలన్న వాదనను అంగీకరించలేదు. ఈ కేసులో దర్యాప్తు ప్రత్యేక బృందం ఆధ్వర్యంలో కొనసాగుతున్న విషయాన్ని కూడా పరిగణనలోకి తీసుకుంది. ప్రధాన న్యాయమూర్తి సూర్యకాంత్‌, న్యాయమూర్తులు జయమాల్య బాగ్చి, వి. మోహనలతో కూడిన ధర్మాసనం బదిలీ పిటిషన్‌లో జోక్యం చేసుకునేందుకు నిరాకరిస్తూ దానిని కొట్టివేసింది. దీంతో తిరుమల లడ్డూ నెయ్యి కల్తీ కేసు విచారణను మరో రాష్ట్రానికి మార్చాలన్న పిటిషనర్‌ ప్రయత్నానికి సుప్రీంకోర్టులో చుక్కెదురైంది. కేసు దర్యాప్తు, తదుపరి న్యాయపరమైన ప్రక్రియ ప్రత్యేక దర్యాప్తు బృందం, సంబంధిత న్యాయస్థానాల పరిధిలో కొనసాగనుంది.