15 Oct 2025 (senani.net): మన జీవితాల్లో టెక్నాలజీ ప్రవేశించిన వేగం ఎంత అయితే ఆశ్చర్యకరమో, దాని ప్రభావం మన శరీరాలపై పడుతున్న నిశ్శబ్ద భారం అంతే ఆందోళన కలిగిస్తోంది. కంప్యూటర్‌ ముందు గంటల తరబడి కూర్చోవడం, మొబైల్‌ ఫోన్‌ను నిరంతరం వంచుకుని చూడడం, టాబ్లెట్‌పై పని చేయడం మన రోజువారీ జీవనశైలిలో భాగమైపోయాయి. ఈ అలవాట్లు నెమ్మదిగా వెన్నెముకను దెబ్బతీస్తున్నాయని గమనించే వారు తక్కువ. ప్రపంచ వెన్నెముక దినోత్సవం సందర్భంగా ఈ సమస్యను గంభీరంగా ఆలోచించాల్సిన అవసరం ఉంది. పాత కాలంలో మనుషుల జీవితం కదలికలతో నిండివుండేది. పొలాల్లో పని, నడకలు, శారీరక కృషి ఎక్కువగా ఉండేది. కానీ ఇప్పుడు పని ఎక్కువగా కుర్చీలోనే కుదించుకుంది. ఈ కూర్చునే విధానం కూడా సరైన భంగిమలో ఉండకపోవడం వల్ల వెన్నెముకపై ఒత్తిడి పెరుగుతోంది. ఒక మనిషి సహజంగా నిలబడిన స్థితిలో వెన్నెముకకు పడే బరువు కంటే మొబైల్‌ చూస్తూ తల వంచినప్పుడు పడే బరువు అనేక రెట్లు అధికమని వైద్యుల హెచ్చరిక. ఈ ఒత్తిడి నొప్పి రూపంలో మొదలై, క్రమంగా నాడులపై ప్రభావం చూపి, జీవితాన్ని బాధాకరంగా మార్చగలదు.
పిల్లల్లో ఈ సమస్య మరింత వేగంగా పెరుగుతోంది. ఆన్‌లైన్‌ తరగతులు, వీడియో గేమ్స్‌, సామాజిక మాధ్యమాలతో పిల్లలు గంటల తరబడి ఒకే స్థానంలో వంగి కూర్చుంటున్నారు. చిన్న వయస్సులోనే భుజ నొప్పులు, మెడ బిగుసుకుపోవడం, వెన్ను బరువుగా అనిపించడం లాంటి సమస్యలు కనిపించడం ఆందోళన కలిగించే విషయం. పాఠశాలల్లో శరీర భంగిమపై అవగాహన కల్పించే ప్రయత్నాలు జరుగుతున్నప్పటికీ, ఇంటి వాతావరణంలో ఆ జాగ్రత్త కొనసాగడం లేదు. పుస్తక సంచుల బరువు తగ్గించేందుకు జరిగిన పోరాటం తరువాత ఇప్పుడు గాడ్జెట్ల బరువు కనిపించని విధంగా వెన్నెముకను వంచిస్తోంది.
ఉద్యోగుల జీవితం కూడా పెద్దగా భిన్నంగా లేదు. లక్ష్యాలు, డెడ్‌లైన్లు, ఆఫీస్‌ ఒత్తిడులు మధ్యలో శరీర భంగిమపై ఆలోచించేందుకు సమయం కూడా చాలామందికి ఉండదు. ఒక పోజిషన్‌లో గంటల పాటు కుదురుగా కూర్చోవడం వలన వెన్నెముక సహజ వంపు మారిపోతుంది. తాత్కాలిక నొప్పిని గమనించకుండా వదిలేస్తే అది దీర్ఘకాలిక సమస్యగా మారి జీవన నాణ్యతను దెబ్బతీస్తుంది. నడవడం, కొంచెం కదలడం, మధ్య మధ్యలో లేచి చాచుకోవడం వంటి చిన్న చర్యలు పట్టించుకోకపోవడం వలన పెద్ద నష్టం సంభవిస్తోంది. వెన్నెముక ఆరోగ్యం కేవలం వైద్య సమస్య కాదు, అది జీవనశైలిలోని అసమతుల్యతకు సూచిక. మొబైల్‌, ల్యాప్‌టాప్‌ వాడకుండా ఉండడం సాధ్యం కాకపోయినా వాటిని ఉపయోగించే విధానంలో మార్పులు చేసుకోవచ్చు. తల నిటారుగా ఉండేలా స్క్రీన్‌ను కంటి స్థాయికి తేవడం, వెన్నుకు ఆశ్రయం కలిగేలా కుర్చీ ఎంచుకోవడం, ప్రతి గంటకు కనీసం ఐదు నిమిషాలు నడవడం వంటి చర్యలు సహజమైన పరిష్కారాలుగా మారవచ్చు. యోగా, ప్రాణాయామం, సాదాసీదా స్ట్రెచింగ్‌ వ్యాయామాలు వెన్నెముకను చురుకుగా ఉంచగల సాధనాలు.
మన శరీరానికి ఉన్న పట్టుదల మనసుకు లేకపోతే శరీరం పడే భారాన్ని భవిష్యత్తులో భరించవలసిందే. వెన్నెముక మన శరీరానికి ధృఢతనిచ్చే స్తంభం. ఆ స్తంభం వంగిపోతే మన ఘనత కూడా వంగిపోవాల్సిందే. కాబట్టి టెక్నాలజీని తప్పుబట్టకుండా దాన్ని సరిగా వినియోగించడం నేర్చుకోవాలి. స్క్రీన్‌ల ముందు గడుపుతున్న సమయాన్ని తెలివిగా విభజించాలి. శరీరానికి అది శరీరమని గుర్తు చేసే విధంగా ప్రతిరోజు కొద్దిపాటి కదలికకు అలవాటు పడాలి. వెన్నెముక ఆరోగ్యం కాపాడుకోవడం అంటే కేవలం నొప్పి నివారణ కాదు, అది స్వేచ్ఛగా కదలాడే జీవితం కోసం తీసుకునే ముందస్తు జాగ్రత్త. టెక్నాలజీ యుగంలో మన భవిష్యత్తు వంగిపోయిన వెన్నెముకలతో కాకుండా, నిటారుగా నిలిచే ఆరోగ్యంతో ఉండాలంటే ప్రతి మనిషి ఇప్పుడే ఆలోచించడం ప్రారంభించాలి.
వెన్నెముక బాధ ఒకసారి మొదలైతే అది క్రమంగా మానసిక ఆరోగ్యాన్ని కూడా ప్రభావితం చేయగలదు. నొప్పి కారణంగా పనిపై దృష్టి కేంద్రీకరించలేకపోవడం, చిరాకు, అలసట, చిరు బాధలతో రోజువారీ జీవితం భారంగా అనిపించడం సహజం. ఈ స్థితి కొనసాగితే ఉత్సాహం తగ్గి జీవితం నిస్సారంగా అనిపించే స్థాయికి చేరుతుంది. తక్షణ ఉపశమనం కోసం నొప్పి నివారణ మాత్రలు తీసుకోవడం తాత్కాలిక ఉపాయం మాత్రమే. కానీ అసలు సమస్యను తగ్గించేందుకు జీవనశైలిలో మార్పులు తప్పనిసరి. కుటుంబాల్లో పిల్లలు, పెద్దలు అందరూ గాడ్జెట్లలో మునిగిపోయే ఈ కాలంలో, ఒకరితో ఒకరు మాట్లాడటం కంటే స్క్రీన్‌కు ఆసరా పెట్టుకోవడం ఎక్కువైంది. ఈ నిశ్శబ్ద జీవనశైలి శరీరం మాత్రమే కాదు, మనసును కూడా బిగుసుకు పోయేలా చేస్తోంది. శరీరాన్ని చలనం లో ఉంచడం అంటే కేవలం ఆరోగ్య షయం కాదు, అది సంబంధాలను కదలికలో ఉంచే మార్గం కూడా. కుటుంబంగా నడకకు వెళ్లడం, ఇంట్లోనే కలిసి కొన్ని సులభమైన స్ట్రెచింగ్‌లు చేయడం వెన్నెముక ఆరోగ్యాన్ని కాపాడటమే కాక, జీవనశైలిలో సాన్నిహిత్యం పెంచుతుంది.
వెన్నెముక ఆరోగ్యం గురించి మాట్లాడేటప్పుడు ఉద్యోగ ప్రదేశాల్లో ఉండే బాధ్యతను కూడా మర్చిపోకూడదు. ఆఫీసుల్లో శరీరానికి అనుకూలమైన కుర్చీలు అమర్చడం, ఉద్యోగులను మధ్య మధ్యలో కదలిక చేయాలని ప్రోత్సహించడం, చిన్న విరామాలకు అవకాశం ఇవ్వడం వంటి చర్యలను అనుసరించడం సంస్థల బాధ్యతగా మారాలి. ఉద్యోగి ఆరోగ్యం కాపాడితేనే అతను సంస్థకు నిరంతరం శక్తివంతంగా పనిచేయగలడు అనే అవగాహన పెరగాలి.
ఇది మొత్తంగా చూసినప్పుడు టెక్నాలజీ మన జీవితాన్ని సులభతరం చేసినా, దాన్ని ఎలా వినియోగిస్తామన్నది మన ఆరోగ్యాన్ని నిర్ణయిస్తుంది. వెన్నెముక మన శరీరానికి ఇచ్చిన బలమైన బహుమతి. దానిని నిర్లక్ష్యం చేస్తే ఆ బలం బలహీనతగా మారుతుంది. ఈ దినం ఒక గుర్తింపుగా కాకుండా ఒక సంకల్పంగా మారాలి. ప్రతిరోజూ కొద్దిపాటి కదలిక, సరిగా కూర్చునే అలవాటు, శరీరాన్ని వినే మనసు ఇవే ఆరోగ్యకరమైన వెన్నెముకకు బలమైన ఆధారం.
– విశ్లేషణ : M రాజు పాత్రికేయులు,
